加勒比海首會團友 高佩雲苦練止嘔術
高佩雲將成為首位香港女太空人,為適應太空無重狀態,她準備玩盡全球最刺激的遊樂場,「訓練」自己不再嘔吐為止。
香港女飛機師高佩雲落實參加由維珍集團老闆布蘭森 (Richard Branson) 舉辦的太空之旅,一百位人士中,她是唯一的亞洲人,順利的話,預計明年底或09年初可正式登上太空。
早前布蘭森安排14位準太空人到其私人小島、位於加勒比海群島的其中一個小島Necker Island互相認識,每人均可帶一名同行者 ,高佩雲遂帶妹妹出席。
在五日四夜的行程中,主人家悉心安排,令高佩雲樂而忘返︰「個島係Richard私人擁有,平時冇機會去,除非有大集團租咗個島啦﹗嗰度有十四間房,環境好幽美,我哋去咗五日,Richard每日都安排唔同嘅節目,啲野又好食,最特別係有日食壽司,佢將啲壽司放喺啲船仔上,再放喺泳池,要食嘅話就要跳入泳池攞,雖然古靈精怪,但好有心思好得意,今次係第一次同其他人 (太空團友) 會面,大家真係了解多咗,識咗好多新朋友。」
八月赴佛州訓練
另外,高佩雲透露八月將會到佛羅里達州的美國太空基地進行反地心吸力訓練︰「依家預計出年年底或者09年上太空,依家有一百位準太空人,但每次只可以六個人上去,所以要抽籤,睇吓邊個先邊個後。」
為上太空,她亦列了三大準備工夫督促自己,她說︰「首先要排毒減肥,跟住跑步做運動,我會去墳場跑步,因為跑步唔會化妝,唔想畀人見到。最後我會去全世界各個遊樂場,玩啲最刺激嘅機動遊戲,玩到自己唔嘔為止,因為驚上太空會嘔,所以要練定先﹗」高佩雲又表示,今次上太空想證明女性也可以多方面挑戰,只要有目標,萬事可達成。